Sjóðfélagi og maki hans geta skipt með sér lífeyrisréttindum með þrennskonar hætti:

Skipting eftirlaunalífeyrisgreiðslna

Á grundvelli samkomulags sjóðfélaga og maka hans getur sjóðfélagi ákveðið, að eftirlaunagreiðslur sem renna eiga til hans, skuli allt að hálfu renna til maka hans eða fyrrverandi maka. Skal lífeyrissjóðurinn þá skipa greiðslum í samræmi við ákvörðun sjóðfélagans, en þær falla niður við andlát hans. Deyi makinn eða fyrrverandi maki, sem nýtur slíkra greiðslna, hins vegar á undan sjóðfélaganum, skulu greiðslurnar renna óskiptar til sjóðfélagans.

Skipting uppsafnaðra eftirlaunalífeyrisréttinda og framtíðarlífeyrisréttinda

Á grundvelli samkomulags sjóðfélaga og maka hans, getur sjóðfélagi í síðasta lagi fyrir 60 ára aldur sinn, og ef sjúkdómar eða heilsufar draga ekki úr lífslíkum hans, ákveðið, að verðmæti uppsafnaðra eftirlaunalífeyrisréttinda hans skuli allt að hálfu renna til að mynda sjálfstæð eftirlaunalífeyrisréttindi fyrir maka hans eða fyrrverandi maka, og skerðast þá eftirlaunalífeyrisréttindi sjóðfélagans sem því nemur. Eftirlaunalífeyrir makans ákvarðast af mati tryggingafræðings og miðast við að heildarskuldbindingar sjóðsins aukist ekki við þessa ákvörðun sjóðfélagans. Sama er hægt að gera við framtíðarlífeyrisréttindi og gilda sömu skilyrði og um skiptingu uppsafnaðra eftirlaunalífeyrisréttinda.

Samkomulag sjóðfélaga og maka hans, skal eftir því sem við á, fela í sér gagnkvæma og jafna skiptingu áunninna eftirlaunalífeyrisréttinda beggja aðila, meðan hjúskapur, staðfest samvist eða óvígð sambúð hefur staðið eða stendur.

Til baka, Senda grein, Prenta greinina