Það er skylda samkvæmt lögum að greiða að minnsta kosti 12% af launum í þessa tegund sparnaðar og svo er greitt út úr samtryggingardeild til sjóðfélagans eftir að taka lífeyris hefst allt til dauðadags. Af þessu 12% iðgjaldi greiðir launþegi 4% en launagreiðandi greiðir 8% í mótframlag.

Fyrir iðgjald sem nemur 12% af launum og greitt er í 40 ár í lífeyrissjóð ber sjóðnum samkvæmt lögum að tryggja sjóðfélaga í mánaðarlegan lífeyri, 56% af þeim mánaðarlaunum sem hann greiddi af. Stafir tryggja sínum sjóðfélögum þetta, og gott betur. Það er markmið sjóðsins að hámarka þau réttindi sem sjóðfélagar fá fyrir greitt iðgjald.

Iðgjöld sjóðfélaga mynda grundvöll lífeyrisréttinda hans. Réttindi eru reiknuð út frá ákveðnum réttindatöflum sem fylgja samþykktum sjóðsins. Réttindi fara eftir því á hvaða aldri sjóðfélaginn er þegar iðgjaldið er greitt inn í sjóðinn. Áunnin réttindi eru verðtryggð með vísitölu neysluverðs. Rétt er að hafa í huga að réttur til lífeyris fellur ekki niður þótt sjóðfélagi hætti að greiða til sjóðsins, heldur geymist rétturinn þar til taka lífeyris hefst.

Greitt er í lífeyrissjóð af heildarlaunum, þ.e. dagvinnu, yfirvinnu, vaktaálagi, orlofi, ákvæðisvinnuhagnaði, bónus og öðrum launum.

Til baka, Senda grein, Prenta greinina