Flutningur á réttindum milli hjóna og sambúðarfólks

Lífeyrisréttindi eru persónubundin og því óheimilt að framselja þau. Samkvæmt heimild í lögum geta sjóðfélagi og maki hans gert með sér samkomulag um skiptingu ellilífeyrisréttinda. Um þrjá möguleika er að ræða.

1. Skipting á ellilífeyrisgreiðslum. Eingöngu er um að ræða skiptingu á núverandi ellilífeyrisgreiðslum milli maka og skal skiptingin vera gagnkvæm og jöfn. Við fráfall sjóðfélagans falla greiðslur til maka niður. Við fráfall maka fær sjóðfélagi hins vegar greiddan fullan ellilífeyri.
2. Skipting á þegar áunnum ellilífeyrisréttindum. Beiðni um skiptingu þarf að hafa borist a.m.k. sjö árum áður en taka ellilífeyris getur fyrst hafist.. Aðeins má skipta þeim réttindum sem áunnust meðan hjúskapur, sambúð eða samvist varði. Eftir skiptinguna, sem er óafturkallanleg, verða ellilífeyrisréttindi beggja aðila sjálfstæð og fær hvor aðili greiddan ellilífeyri til æviloka.
3. Skipting á framtíðarréttindum, þ.e. þeirra ellilífeyrisréttinda sem ávinnast eftir að samkomulagið er gert og þar til hjúskap, sambúð eða samvist er slitið.

Eftirtalin skilyrði þarf að uppfylla:

• Samkomulagið skal einungis taka til skiptingar ellilífeyrisréttinda.
• Sjóðfélaginn og maki hans þurfa að gera með sér skriflegt samkomulag um skiptinguna og tilkynna hlutaðeigandi lífeyrissjóðum um það.
• Skiptingin er varanleg og fellur ekki úr gildi ef annað hjóna fellur frá á undan hinu.
• Hægt er að segja upp samkomulagi um skiptingu framtíðarréttinda og lífeyrisgreiðslna.
• Skipting ellilífeyrisréttindanna tekur til þeirra sem eru eða hafa verið í hjúskap, óvígðri sambúð eða staðfestri samvist.
• Skipting ellilífeyrisréttinda skal fela í sér gagnkvæma skiptingu sem skal vera jöfn, þ.e.a.s. hvort hjóna eða sambúðarfólks skal veita hinu sama hlutfall réttinda sinna. Þess vegna þurfa báðir aðilar að skipta ellilífeyrisréttindum sínum. Heimilt er að framselja til makans allt að helmingi þeirra réttinda sem um er að tefla.
• Skiptingin skal einungis taka til áunninna réttinda meðan hjúskapur, óvígð sambúð eða staðfest samvist hefur staðið eða stendur.
• Ef til staðar er samningur til skiptingar réttinda skv. möguleikum 2 og 3 getur hvor samningsaðila sagt samningnum skriflega upp með 3ja mánaða fyrirvara, enda standi aðrir samningar eða fyrirmæli því ekki í vegi. Ekki er hægt að segja upp samningi samkvæmt möguleika 1.

Til baka, Senda grein, Prenta greinina