Hér er búið að taka saman svör við nokkrum algengum spurningum. Allar nánari upplýsingar og skýringar má finna í lögum og reglum um lífeyrissjóði, og samþykktum Stafa. Starfsfólk sjóðsins veitir einnig fúslega ráð og upplýsingar varðandi örorkulífeyri.

Spurning 1: Á ég rétt á örorkulífeyri?

Sjóðfélagi sem verður fyrir orkutapi sem nemur a.m.k. 50% og verður fyrir sannanlegri tekjuskerðingu vegna þess á rétt á örorkulífeyri að uppfylltum ákveðnum skilyrðum. Hafðu samband við sjóðinn svo hægt sé að skoða þinn rétt til örorkulífeyris.

Spurning 2: Nú lenti ég í slysi og er frá vinnu. Ég ætla mér að komast út á vinnumarkaðinn aftur. Á ég rétt á örorkulífeyri?

Það er mögulegt. Örorkulífeyrir er greiddur frá þeim tíma er greiðslur úr sjúkrasjóði hætta og þar til sjóðfélagi nær heilsu á ný en aðeins á meðan tekjur eru lægri en áður en sjóðfélaginn varð fyrir orkutapi. Hafðu samband við sjóðinn svo hægt sé að skoða þinn rétt til örorkulífeyris.

Spurning 3: Hvaða gögnum þarf ég að skila inn til að sækja um örorkulífeyri? Og hvað tekur þetta langan tíma?

Skila þarf inn umsókn, tekjuáætlun, ítarlegu læknisvottorði, afriti af skattframtali síðustu fjögurra ára fyrir orkutap sem og framtölum til dagsins í dag. Einnig þarf vottorð frá Hagstofu Íslands vegna allra barna sem sjóðfélagi á, þar sem greiddur er barnalífeyrir vegna allra barna örorkulífeyrisþega.

Umsóknarferlið getur tekið 2-3 mánuði frá því umsókn berst sjóðnum með öllum gögnum þar til greiðslur fara að berast.

Spurning 4: Hvenær fæ ég greiddan örorkulífeyrinn minn?

Umsóknarferlið getur tekið 2-3 mánuði frá því umsókn berst sjóðnum með öllum gögnum þar til greiðslur fara að berast. Örorkulífeyrir er greiddur eftirá, fyrsta virka dag mánaðar. Örorkulífeyrir greiðist ekki fyrir fyrstu þrjá mánuðina eftir orkutap. Ekki er greiddur örorkulífeyrir, ef orkutap hefur varað skemur en í sex mánuði. Ef sjúkrasjóður eða vinnuveitandi greiðir laun áfram eftir orkutap þá hefjast greiðslur örorkulífeyris frá lífeyrissjóðnum þegar þær greiðslur hætta að berast.

Spurning 5: Get ég tekið örorkulífeyrinn minn út allan í einu?

Nei, örorkulífeyrir er alltaf greiddur út í mánaðarlegum greiðslum.

Spurning 6: Af hverju var örorkulífeyririnn minn lækkaður?

Það er tvennt sem kemur til greina sem ástæða fyrir lækkun örorkulífeyris:

• Örorkulífeyri er bara ætlað að bæta tekjutap af völdum örorku. Núverandi tekjur geta því skert lífeyrinn og oftast er það ástæða lækkun lífeyris.

• Ef breyting verður á örorkuhlutfalli, t.d. ef örorkuhlutfall lækkar úr 100% í 75%, þá skerðist lífeyririnn í hlutfalli við það.

Vinsamlegast hafðu samband við sjóðinn svo hægt sé að skoða það með þér hvað veldur lækkuninni.

Spurning 7: Hvenær klárast greiðslurnar til mín?

Trúnaðarlæknir sjóðsins metur hve lengi þú átt að fá greiðslur. Hann getur metið þig til tímabundinnar örorku og falla þá greiðslur niður að þeim tíma liðnum nema skilað sé inn nýju vottorði sem sýnir fram á áframhaldandi örorku.

Ef örorkuhlutfall fer niður fyrir 50% þá fellur niður réttur til örorkulífeyris.

Ef tekjur þínar fara uppfyrir þær tekjur sem þú hafðir fyrir orkutap. Þ.e. ef um tekjuskerðingu er ekki lengur að ræða þá áttu ekki rétt á lífeyri frá sjóðnum.

Ef þú ert með varanlega örorku færðu greiddan örorkulífeyri til 67 ára aldurs. Eftir það tekur við eftirlaunalífeyrir.

Til baka, Senda grein, Prenta greinina