Margir atvinnurekendur brugðust trausti

Þetta var efnislegur boðskapur í svörum Haraldar H. Jónssonar stjórnarformanns og Ólafs Sigurðssonar framkvæmastjóra á kynningarfundi Stafa lífeyrissjóðs í Reykjavík. Þeir svöruðu fyrirspurnum fundarmanna um ástæður þess að 12,9% vantaði upp á að eignir sjóðsins stæðu undir heildarskuldbindingum og að sjóðsstjórn leggði nú til 10% skerðingu lifeyrisréttinda í áföngum til að bæta tryggingafræðilega stöðu sjóðsins.

Dökk mynd af starfsumhverfi Stafa

Ólafur brá upp glæru með lista yfir fyrirtæki sem Stafir höfðu áttuskuldabréf hjá en töpuðu að stórum hluta eða jafnvel að öllu leyti í nauðasamningum og gjaldþrotum. Listinn verður birtur í væntanlegri ársskýrslu Stafa. Framkvæmdastjórinn tók svo til orða að stuðningur sjóðsins við atvinnulífið hefði í þessu ljósi verið dýrkeyptur og þessir atvinnurekendurnir hefðu brugðist sjóðfélögum. Fall bankanna og gengishrun íslenskrar krónu væri engu að síður stóri orsakavaldurinn. Þar hefðu atvinnurekendur og sveitarfélög ekki verið vel undirbúin og því hefði tryggingarstaða kröfuhafa í raun versnað mikið á vormánuðum 2008 og enn frekar við fall bankanna þá um haustið.

Framkvæmdastjóri Stafa dró upp upp dökka mynd af starfsumhverfi Stafa og annarra lífeyrissjóða og lýsti áhyggjum af framtíðarhorfum ef ríkisstjórnin aflétti ekki fljótlega gjaldeyrishöftunum. Horft væri til lífeyrissjóða með stuðning og þátttöku í verkefnum, enda væri ríkið sjálft í afar þröngri stöðu með skuldir sínar og hallarekstur. Íbúðalánasjóður uppfyllti ekki lágmarksskilyrði um eiginfjárhlutfall, Landsbankinn ekki heldur og ríkið væri svo í óbeinni ábyrgð fyrir öllum innlánum í bönkum, Icesave-skuldinni, skuldum Landsvirkjunar og lífeyrisskuldbindingum ríkisstarfsmanna upp á talsvert á sjötta hundruð milljarða króna.

Hvað meinti fjármálaráðherra?

Ólafur sagði að lífeyrissjóðirnir yrðu að meta þátttöku sína í framkvæmdum og samfélagsverkefnum út frá hagsmunum sínum og sinna umbjóðenda gagnvart arðsemi. Hann vék í beinu framhaldi að ávarpi Steingríms J. Sigfússonar fjármálaráðherra á aðalfundi  LL á þann veg að ráðamenn sjóðanna  ættu sjálfir að taka frumkvæði í fjárfestingum, til að koma hjólum atvinnulífsins í gang, frekar en að bíða og skamma  ríkisstjórnina fyrir aðgerðaleysi. Hins vegar kom fram hjá ráðherranum að lífeyrissjóðirnir skilgreindu arðsemi hugsanlega of þröngt, þeir ættu að horfa líka á „samfélagslegan ágóða“ verkefna. Þess vegna biði hann spenntur eftir því að sjá hvernig ummæli ráðherrans yrði rædd og túlkuð.

 Ólafur Sigurðsson sagðist reyna að túlka hvað fjármálaráðherra væri þarna að fara en sagði að tryggingarstærðfræðingar væru nokkuð nákvæmir þegar þeir mætu getu sjóðsins til að greiða lífeyri. Þeir hefðu væntanlega ekki mikinn skilning á „samfélagslegum ágóða".

Ársfundurinn næsta dagskrármál!

Um þrjátíu sjóðfélagar mættu á kynningarfund Stafa í gærkvöld. Umræður voru líflegar, enda stóð fundurinn yfir í hálfa þriðju klukkustund.

Tímasetning samkomunnar var engin tilviljun:

• Á fimmtudaginn í næstu viku, 27. maí, verður ársfundur Stafa á Radisson Blu Hótel Sögu og hefst kl. 17:00.
• Tillögum til umræðu og afgreiðslu á ársfundi ber að skilja minnst einni viku fyrir aðalfund, með öðrum orðum fyrir kl. 17:00 á morgun, fimmtudaginn 20. maí. Þess vegna vilja stjórn og starfsmenn Stafa gefa sjóðfélögum kost á að ræða mögulegar tillögur í tæka tíð fyrir fundinn og kynna sér málefni sjóðsins.

Til baka, Senda grein, Prenta greinina