Stafir kaupa íbúðabréf fyrir 4,2 milljarða króna

Upplýst var um skuldabréfaviðskipti lífeyrisjóðanna á blaðamannafundi seðlabankastjóra og forystumanna Landssamtaka lífeyrissjóða í morgun. Hér er fyrst og fremst um að ræða skuldabréf sem Íbúðalánasjóður gaf út 2008 og urðu fyrir fáeinum dögum eign Seðlabanka Íslands með samkomulagi við seðlabanka Luxemborgar og slitastjórn Landsbanka Íslands í Luxemborg.

Við fengum tilboð um að kaupa þessi skuldabréf í Seðlabankanum á afar góðum kjörum. Þetta er því fjárfesting sem styrkir sjóðinn, flýtir fyrir því að gjaldeyrishöftum verði aflétt og stuðlar vonandi að því að koma hjólum atvinnulífsins á skrið á nýjan leik. Það er knýjandi nauðsyn að fara að sjá fyrir enda kuldaskeiðs í atvinnumálum landsmanna“, segir Ólafur Sigurðsson, framkvæmdastjóri Stafa.

Í ávarpi stjórnarformanns Stafa í nýrri ársskýrslu sjóðsins fyrir árið 2009 er talað um að íslenskir lífeyrissjóðir búi áfram við „mikla efnahagslega áhættu“ og bent á að Íbúðarlánasjóður, stærsti einstaki skuldari Stafa, uppfylli ekki skilyrði um 5% eiginfjárhlutfall. Hvernig ríma stórkaup lífeyrisjóða á íbúðabréfum við yfirlýsingar um að íbúðalán teljist til áhættufjárfestinga?

Ólafur segir að vissulega fylgi því ákveðin áhætta að fjárfesta í íbúðarbréfum og að lífeyrissjóðir dragi augljóslega tímabundið úr áhættudreifingu fjárfestinga sinna með nýja skuldabréfasamningnum við Seðlabankann. Þegar litið sé til lengri tíma verði það hins vegar bæði lífeyrissjóðum og landsmönnum öllum til gæfu ef takist að koma þjóðinni úr efnahagslegri sjálfheldu sem hún sé í. Lífeyrissjóðunum sé til að mynda kappsmál að stjórnvöld aflétti sem fyrst gjaldeyrishöftum og ráðamenn sjóðanna sjái möguleika til að flýta fyrir þeirri atburðarás með því að selja hluta erlenda eigna sjóðanna, flytja peningana heim og greiða þannig fyrir því að gjaldeyrisviðskipti verði frjáls á ný.

• Sjá fréttir um skuldabréfakaupin á heimasíðu Landssamtaka lífeyrissjóða hér og hér.

Til baka, Senda grein, Prenta greinina