Allur lífeyrir nú greiddur eftir á hjá Stöfum

Lífeyrisþegar sem tilheyrðu Samvinnulífeyrissjóðnum fyrir sameiningu hans við Lífeyrissjóðinn Lífiðn hafa frá 1. janúar 2005 fengið greiddan lífeyri fyrirfram í byrjun hvers mánaðar. Frá og með marsmánuði 2007 breytist fyrirkomulag lífeyrisgreiðslna á þann veg að öllum lífeyrisþegum sem réttindi eiga í Stöfum lífeyrissjóði, verður greiddur út lífeyrir eftir á. Þetta þýðir að lífeyrir fyrir febrúar var greiddur út 1. febrúar, en lífeyrir fyrir mars verður greiddur út 1. apríl.

Forsaga málsins

Á ársfundi Samvinnulífeyrissjóðsins á árinu 2006 voru gerðar breytingar á samþykktum sjóðsins í þá veru að greiða bæri lífeyri eftirá. Sú breyting tók gildi þann 1. janúar 2007, um leið og sameinaður sjóður Samvinnulífeyrissjóðsins og Lífeyrissjóðsins Lífiðnar tók til starfa undir nafninu Stafir lífeyrissjóður. Öllum sem málið varðar var sent bréf með nærri þriggja mánaða fyrirvara þar sem gerð var grein fyrir þessari breytingu. Í því bréfi var fólki einnig boðin aðstoð við aðlögun að þessu nýja fyrirkomulagi. Aðlögun felst í því að sjóðurinn getur greitt lífeyrisþegum fyrirfram lífeyri þann 1. mars og boðið lífeyrisþegum að dreifa endurgreiðslu á þeirri greiðslu á nokkra mánuði.

Ástæður breytinga

Við sameiningu sjóðanna var ljóst að samræma þyrfti greiðslufyrirkomulag sjóðanna svo allir lífeyrisþegar sætu við sama borð varðandi tilhögun útborgana. Nær allir lífeyrissjóðir á Íslandi greiða lífeyri eftir á með sama hætti og gert er hjá Stöfum nú. Á vinnumarkaði tíðkast einnig almennt að greitt er eftir á. Þegar lífeyrisþegar fengu tilkynningu um greiðslur frá Greiðslustofu lífeyrissjóða sem greiðir út lífeyri fyrir flesta lífeyrissjóði á Íslandi, olli það oft miklum misskilningi að á sama seðli birtust yfirlit yfir greiðslur fyrir sitthvorn mánuðinn. Einnig voru jafnvel vandræði með nýtingu skattkorts vegna þessa.

Ekki niðurfelling heldur tilfærsla

Mikilvægt er að hafa í huga að greitt er fyrir alla mánuði ársins á árinu eftir sem áður og þarf því ekki að breyta tekjuáætlun til Tryggingastofnunar ríkisins af þessum völdum þar sem greiðsla fyrir desember er greidd út í lok desember. Ekki er verið að fella niður greiðslur, heldur færa greiðslurnar til um einn mánuð. Samkvæmt reglum sjóðsins ber að greiða fyrir þann mánuð sem sjóðfélaginn andast í og er engin breyting þar á. Minni líkur eru hinsvegar á því að greitt sé lengur en fyrir andlátsmánuð, þegar greitt er eftir á. Sjóðfélagar Stafa eru rúmlega 50.000 talsins og er því mikilvægt að allir fái þær greiðslur sem þeim ber, og reiknaðar hafa verið út af tryggingastærðfræðingi sjóðsins.

Við verðum við símann

Stjórn og starfsmenn Stafa gera sér glögga grein fyrir þeim óþægindum sem breytingin kann að valda. Það er því sjálfsagt mál að sjóðfélagar leiti svara við spurningum og kalli eftir ráðum eða aðstoð sem sjóðnum er fært að veita til að draga úr tímabundnum áhrifum þess að nýtt greiðslufyrirkomulag er tekið upp.

Símanúmer sjóðsins er 569-3000.

Til baka, Senda grein, Prenta greinina